Самарқанд шаҳрининг туристик салоҳияти Санкт-Петербургда тақдим этилди
Ташриф доирасида мамлакатимиз Бош консулхонаси кўмагида Самарқанд шаҳрининг сайёҳлик имкониятлари тақдимоти ва "Роад шоу" ташкил этилди.
Иштирокчиларга Самарқанднинг ноёб тарихий-маданий мероси, туризм инфратузилмаси, янги йўналишлар ва россиялик сайёҳлар учун яратилган имкониятлар ҳақида маълумотлар берилди.
Туризм соҳасида икки томонлама ҳамкорликни кенгайтириш, Россия туроператорлари учун қўшма маркетинг кампаниялари ва реклама турларини ташкил этиш масалаларига эътибор қаратилди. Ҳамкорлик шартномаларини имзолаш, туризм соҳаси мутахассислари учун таълим дастурларини ишлаб чиқиш ва маданий-маърифий туризм соҳасида қўшма лойиҳаларни жорий этиш истиқболлари муҳокама қилинди.
Санкт-Петербург Туризмни ривожлантириш қўмитаси раиси ўринбосари Илья Баннов Ўзбекистон билан ҳамкорлик фаол ривожланиб бораётганини, мамлакатларимиз ўртасидаги сайёҳлик алмашинувининг кескин ўсаётгани бу йўналишга катта қизиқиш борлигидан далолат беришини таъкидлади.
"Silk Road Samarkand" туркомпанияси вакиллари шаҳарнинг MICE -туризми соҳасидаги салоҳиятига эътибор қаратдилар. Таъкидланганидек, замонавий инфратузилма, конгресс марказлари ва логистика ечимларининг мавжудлиги Самарқандга ўзини минтақавий ва халқаро миқёсда ишбилармонлик учрашувлари маркази сифатида кўрсатиш имконини берди. Санкт-Петербургдаги ихтисослашган ташкилотлар билан қўшма лойиҳаларни ташкил этиш бўйича алоқаларни мустаҳкамлашдан манфаатдорлик билдирилди.
Учрашув якунлари бўйича томонлар ҳамкорликни янада мустаҳкамлаш, янги сайёҳлик йўналишларини ишлаб чиқиш ва туристлар оқимини кўпайтиришга қаратилган тадбирларни ўтказишга келишиб олдилар.
Ташриф Санкт-Петербург ва Самарқанд ўртасидаги ўзаро ҳамкорликнинг юқори салоҳиятини тасдиқлади ва туризм соҳасида ҳамкорликни кенгайтириш учун пойдевор яратди.
